Hunangs-soja-lambagrillsteik

 

1 lambalæri

5-6 hvítlauksgeirar, saxaðir smátt

100 ml sojasósa

3 msk þunnt hunang

 

Lærið úrbeinað og skorið í þykkasta vöðvann og honum flett í sundur, þannig

að svipuð þykkt verði á öllu kjötstykkinu. Það er svo pikkað vel með beittum

hnífsoddi á báðum hliðum - sérstaklega þó að utan - og hvítlauknum stráð á

það. Sett í plastpoka. Sojasósa og hunang hrært saman, hellt yfir og lærinu

velt fram og aftur til að lögurinn þeki það. Pokanum er svo lokað, hann

lagður í fat og látinn standa í kæli í um hálfan sólarhring; snúið tvisvar

eða þrisvar. Grillið í ofninum hitað. Kjötstykkið sett á grind sem höfð er

yfir ofnskúffu og grillað í 10-12 mínútur á hvorri hlið. Þá er slökkt á

grillinu en ofninn stilltur á 200 gráður og kjötið látið vera í honum í 5-10

mínútur í viðbót (fer eftir þykkt og hvað það á að vera mikið steikt). Tekið

út og látið bíða nokkra stund áður en það er skorið í sneiðar á ská.